මගේ ගමන් බිමන් එකසිය එකොලොස්වන කොටස - පැට්නා

හැමදාමත් මගේ ගමන් බිමන් එක්ක එකතුවෙලා හිටි මිතුරු මිතුරියන් වෙනුවෙන් ලියන්න තරම් කාලයක් නොමැති නිසා පොඩි ප්‍රමාදයක් තිබුනා වුනත් ඕන ආයෙමත් ලිපියක් එක්ක ආව. ඒ කොයි කවුරුත් ආසාවෙන් යන්න දඟලන තැනක් ගැන විස්තරයක් එක්ක. ඒ තමයි පැට්නා.

 

දෙනියායේ තියෙන හරිම අපූරු විනෝද වෙන්න පුළුවන් තැනක් තමයි පැට්නා කියන්නේ. එනසල්වත්ත වතුයායේ පැට්නා කියන කොටසට අයිති මෙම ස්ථානය වඩා ප්‍රසිද්ධ වෙන්නේ "බුරුස් ගල" නමින් හඳුන්වන දිය සීරාව තියෙන ලිස්සා යා හැකි කොටස නිසාවෙන්.  දෙනියායේ ඉඳන් විහාරහේන මාර්ගයේ ඇවිත් එතැනින් එනසල්වත්ත මාර්ගයට හැරෙන්න ඕන. ඒ පාර දිගේ ගියාම පැට්නා නැරඹුම ලගට එන්න පුළුවන්. එතැනින් පස්සේ තේවත්ත මැදින්  පොඩි දුරක් පයින් යන්න වෙනවා. එවිට පැට්නා "බුරුස් ගල" නමින් හඳුන්වන තැනට එන්න පුළුවන්.

ගිං ගඟ පහලට ජලය ගලා යන තැනකින් ස්වභාවිකව නිර්මාණය වුන මෙම ස්ථානයේ විශාල පිරිසකට එකවර විනෝද වෙන්න පුළුවන් වගේම මේ තැන ඉඳන් ටිකක් පහලට ඇවිදගෙන යද්දී දිය ඇලි කීපයකුත් නරඹන්න පුළුවන්. ගල ඉහලට නැගල කට්ටිය එක්ක පේලියට ගල දිගේ ලිස්සල එන්න පුළුවන් වගේම ජල පහරේ නාල විනෝද වෙන්නත් පුළුවන්. හැබැයි ඉතින් ලිස්සන තැන වැඩිය වැඩ දාන්න ගිහින් දත් එහෙම නැති කරගත්ත අයත් නැතිවාමනොවෙයි. 

 

විනෝද වෙන්න දවසක් ගත කරන්න අපූරු තැනක් වගේම කෑම බීම ගෙනියන්නත් කිසිම තහනමක් නැති නිසා දවසම උනත් ඉඳල එන්න පුළුවන්. හැබැයි ඉතින් එහෙම ගිය බොහෝමයක් අය ගමන් ගෙනියන ප්ලාස්ටික් වගේ දේවල් මෙතැන දාල ඇවිත් නිසා තව ටික කාලෙකින් තහනමට ලක්වෙයිද කියන්න බැහැ. ඒ නිසා තව කෙනෙකුට මේ සුන්දරත්වය විඳින්න ඉඩ තියල මේ තැනට ගිහින් එන්න කියල ඔයාලට මතක් කරනවා.

තවත් පින්තූර බලන්න මෙතැනින්...