අඩු වියදම් Macro Light modifier එකක් Develop කරමු

පහුගිය කාලය පුරාවට ගොඩ දෙනෙක් මගෙන් අහපු ප්‍රශ්ණයකට උත්තරත් අරගෙන මම අද ලියන්න හදන්නෙ අඩුම වියදමකින් ආරම්භකයෙකුට Macro light modifier එකක් හදන්නෙ කොහොමද කියලයි.

මම මේ modifier එක හදපු හැටි සහ ඒක ක්‍රමාණුකූලව දියුණු කල ආකාරය ගැනත් මේ ලිපියෙන් කතා කරන්න බලාපොරොත්තු වෙනවා. 

මම මේක හදන්න ගන්නෙ කඩේ ගන්න තියෙන්න pringles හිස් ටින් එකක්. ඒකෙ දෙපැත්තම සිදුරු කරල එක පැත්තක් ෆ්ලෑෂර් එකට හයි කරන්න පුලුවන් විදියට හදා ගන්න. 

ඊට පස්සෙ ඒක ෆෑෂර් එකට හයි කරාම directional light එකක හදා ගන්න පුලුවන්. මේ තියෙන්නෙ ඒක.

මම මේකා භාවිතා කරන්නෙ Nikon D90 එකක් extension tube set එකක් සහ Nikkor 50mm එකක් එක්ක. එතකොට subject distance එක ගොඩක් අඩුයි. මම හදපු ලයිට් එක වැටෙන්නෙ ඊට වඩා දුරින්.  ඒකෙන් ලැබෙන පින්තූරය මෙන්න මේ වගෙයි.

ඉතින් මම ඒකට මගේ pringles can එක මැදින් V හැඩේට කැපුමක් දාල කෑල්ලක් අයින් කලා. එතකොට මට කෑන් එක නවන්න පුලුවන්. ඒ කරල එතැනට ටේප් එකක් දාල අලව ගත්ත. දැන් මම ගාව තියෙන්නෙ මෙන්න මෙහෙම එකක්.

ඒත් ඒකෙන් එන hash light එක අඩු කරන්න මම electronic බඩු wrapping වලට ගන්න සුදුපාට කොලයක් දැම්ම. 

 ඒකෙන් ගන්න  පින්තූරය මෙන්න වගෙයි.

ලගපාත පසුබිම විදිහට මොනවත් නැතිනම්  ඒ පින්තූරය අවුලක් නෑ. මොකද ඒක කලු පසුමක් විදිහට ලබා ගන්න ලේසි නිසා. නමුත් පසුබිම ලගින් යමක් තියෙනවා  නම් ඒකත් අරමුණ හා සමානව ආලෝකමත් වෙනව.

ඉතින් මෙන්න මෙහෙම වෙන එක නවත්තගන්න එහෙම නැතිනම් ඒක අඩු කරන්න මම hood එකක් දැම්ම. ඊට පස්සෙ ඒක පේන්නෙ මෙන්න මේ විදිහට.

මේ තියෙන්නෙ ඒකෙන් ගත්ත පින්තූරයක්  පින්තූරයක්..

මම මේ පෙන්වල තියෙන පින්තූර කිසිවක් සංස්කරණයට ලක් කරල නෑ.. කැමරාවෙන් එලියට ගද්දී තිබුණ විදිහමයි.

ලාබෙට light modifier එකක් හදාගෙන ඔයාලටත් මේක අත්හදා බලන්න පුලුවන්. මේ ක්‍රමය උත්සාහ කරද්දි කැමරාව සහ ආලෝකය ගැන ඉගෙන ගන්න. ඒ වගේම ඔයාලට තියෙන ප්‍රශ්ණ කමෙන්ට් එකක් විදිහට දාන්න. ඒවාට හැකි අයුරින් පිළිතුරු දෙන්නම්.

ආයේ ලිපියක් එක්ක එනකන් හැමෝටම ආයුබෝවන්.


පින්තූරු අල්ලන හැටි ඉගෙන ගන්න උන්ට.......

එක එක අය පින්තූර ගන්න විදිය වෙනස්.. ඒ වගේමයි එක එක අයගේ පින්තූර ගන්න තෝරගන්න අරමුණු වෙනස්. ඒකට තෝරගන්න කැමරාව පවා එකිනෙකාට වෙනස් වෙනවා. මොබයිල් එකකින් වටේටම පින්තූර කොටනවා වෙනුවට වැටෙන ලයිට් එක ගැන හිතමින් පින්තරයක් ගන්න උත්සාහ කල එකෙක් ගත්ත අපූරු පින්තූරයක් සහ ඒක දියුණු කල හැකි ක්‍රමය ගැන තමා මමමේ කෙටි සටහන් තියන්නේ.. 

මාත් ඒක්ක ඇවිදින උන්ගෙන් එකෙක් අනිත් අයගෙන් වෙන් වෙලා ෆෝන් එකේ කැමරාවත් අරගෙන පින්තූර ගන්න හැටි මම දැක්ක. හෙමින් එතැනට කිට්ටු වුන මම අහපු සමහර දේට දුන්න සරල උත්තර නිසාම මම ඌට මොනව හරි කියා දෙන්න ඕන කියල හිතුවා. 

ඉස්සර වගේ නෙවෙයි කාට හරි දෙයක් කියා දෙන්න හදනවා කියන්නේ දැලි පිහියෙන් කිරි ගන්න හදනවා වගේ වැඩක්. ඒ කොහොම වුනත් අවසානයේ මම තීරණය කරනවා ඌට මොව හරි දෙයක් කියා දෙන්න ඕන කියල. ඉතින් මුට්ටියක් දාල බැලුව මූ අහන වර්ගයේද නැත්තම් දැනුම ජලාශෙක උපන් එකෙක්ද කියල. මූ අහන වර්ගයේ... ඉතින් මම කළවෙනි පාඩම කියා දුන්න.. පින්තූරයක් ගද්දී බලන්න ඕන කාරණා කීපයක් ගැන. ඒ මූලික කරුණු අහගත්තට පස්සේ ඌ මොකක් කරයිද කියල මගේ හිතේ තිබුන දෙගෙඩියාව නිසාම මම ඌ ගැන ඇහැ ගහගෙන හිටිය. මෙන්න පැහැදිලි වෙනසක්.. ඌ පින්තූර ගද්දි ටිකක් හිතන්න පුරුදු වෙලා.

මාස ගානකට පස්සේ මහ රෑ මේකා මට මැසේජ් එකක් එවනව. පින්තූරයක්.. මේ තියෙන්නේ ඒක..

ඊට යටින් ඒ්කා ලියල තියෙනවා මම කියා දීපු දේ නිසා ඒකාට දැන් පින්තූර පේනවලු. ඌ කලින් ගත්ත පින්තූර එක්ක ගත්තාම ඌටම වෙනස තේරිලා.. දැන් ඌ පින්තූරයක් ගන්න කලින් හිතන බවත් කියල මාර ආතල් එකක් උගේ හිතේ පිරිල... මම ඒ පින්තූරෙ මුල් පිටපත් ඊ මේල් එකකින් ගෙන්න ගත්ත ඒකට මෘදුකාංග වලින් පොඩි වෙනස් කම් කීපයක් කරල වර්ණ හා කලුසුදු පින්තූර දෙකක් හදල ඌට යැව්ව.

 

 

 

 

 

 

 

 

 

මට එව්ව මුල් පින්තූරයත් ඒකෙන් හදපු අන්තිම පින්තූර දෙකත් දැකල ගියපු ඒ මලය ආයේ මට කතා කරන්නේ ඌට හිතට වැදුන පින්තූරයක් ගත්තාම කියල මම හොදාකාරවම දන්නව.

කියාල දුන්න දෙයකින් කවුරුහරි වැඩක් ගන්නව දැක්කාම තියෙන සතුට කවදාවත් මිළ කරන්න බැහැ. මේ කතාව ටිකක් පරණ වුනත් අකුරු කරන්න නිදදහසක් ආවේ අද...


වනසන වනාන්තර වල වැරදි ගණනයන්

පහුගිය කාලය පුරාවට මගේ අතින් ලිපියක් අකුරු නොකලෙමි. එයට ප්‍රධාන හේතුව අකුරු කිරීමෙන පමණක් පල නැති බව මා දන්නා නිසාවෙනි. කෙසේ වෙතත් මා තුල ඇති "මෝඩයා" මාගේ පාලනයෙන් තොරව නැවත නැවතත් අවදි වන්නේ අකුරු නොකරම බැරි අවස්ථාවන් වලදී පමණක්මය. මේ එවන් අවස්ථාවක් යැයි මා සිතමි.

සිංහරාජය..

මා මෙතැනින් මදක් නවතින්නට සිතමි. ඒ මා සදහන් කල මේ වචනය කාලීන වීමත් මා ද තවත් එක් සංවිධානයක, පක්ෂයක හෝ පුද්ගලයෙකුගේ ගැත්තෙක් වී ඇතැයි හංවඩු ගසමින් මේ ලිපිය කියවන ඔබ වෙනුවෙන් එක් දෙයක් සදහන් කිරීමටය. හත කී කිසිදු පාර්ශවයක මා ගැත්තෙකු නොවන බව මා ගැන දන්නා උන් හොදින් දනී. තවද ඔබේ සිතිවිල්ල එතැනින් පටන් ගන්නේ නම් මේ ලිපිය කියවීම හැරුණු කොට ඔබගේ "වටිනා" කාලයෙන් වෙනත් "වටිනා වැඩක්" කරගන්න යන ඉල්ලීම කරමි.

පරිසර පද්ධතියක් විනාෂ නොකරමින් මාර්ග සංවර්ධනය කරන්න යැයි දුන් උපදෙස මා සිත කීරී ගස්සන්ට සමත් විය. තවද වනාන්තරයක් යනු අලි කොටි වලසුන් පමණක් යැයි සිතන සමාජයක් ඇති කල උන්ට සාප නොකරමි. ගැණිය හැකි විශාල සතුන් පමණක් වනාන්තරය යයි සිතන උන්ට මාගේ Facebook පිටුව හා Instagram එක පොඩ්ඩක් බලන්න යැයි ආරාධනා කරමි. මෙම සබැදියන් දෙකෙහිම ඔබ දකින්නා වූ බොහෝමයක් පින්තූර සෙන්ටිමීටරයට අඩු සතුන්ගේ හා ශාක කොටස්ය. සමහර සතෙකු ඔබ කිසි දිනෙක පියවි ඇසින් දැක නැති බව නම් මා හට විශ්වාසය. ලංකාවේ බිලාල පවුලේ සියලු වර්ග එකතු කලද කුඩා සතුන්ගේ එක් පවුලකවත් සතුන් වර්ග ගණනට සමකල නොහැකි වන්නේය. 

උදාහරණ වශයෙන් මා කවදත් ඡායාරූපකරණයට ප්‍රිය කල මකුලුවන් වර්ග ගණන මේ වසර වන විට 590 කට ආසන්නය. එයින් 390කට ආසන්න ප්‍රමාණයක් ලංකාවට ආවේණිකය. මේ එක් උදාහරණයක් පමණකි. සිංහරාජ භූමියේ පමණක් ඇති ශාක, ලයිකන වර්ග ප්‍රමාණය හා සතුන් ප්‍රමාණය පිළිබද හාංකවිසියක්වත් නොදන්නා උන් පිරිස් පිටින් පැමිණ කුඩා සතුන් ශාක ප්‍රමාණය චප්ප කරන ආකාරය කැමරාකරුවන් අපූරුවට ප්‍රචාරය කරන අයුරු මා දුටිමි.

පහුගිය කාලය පුරාම සත්ත්ව නිදර්ශක රට පැටවූ උන් අත්අඩංගුවට ගත් ප්‍රවෘත්ති පිලිබදව ඔය ඇවිද "නිරීක්‍ෂණය" කල උන් නොදන්නවා විය හැකිය. නමුත් ඒ නිදර්ශක වලින් සිදු කරන්නා වූ පරීක්‍ෂණ වල ප්‍රතිඵල අප ඒ රටවල් වලින් මිලදී ගන්නේ කොමිස් මුදල් වලින්ද පරිපූර්ණව ය. 

ඩෝසර් කර අවසානය වන විට විනාශ පළමුව විනාශ වන්නේ කුඩා සතුන් හා ශාක කොටස් ඇති පරිසර පද්ධතිය ය. එය විනාශ ව බව පවා නොපෙනෙන තරම්ය. සිංහරාජය මැදින් පස් රතයක් දමන බව ද මා ඇසූවෙමි. එයින් පිටවන දුම ලයිකන හා කුඩා සංවේදී ශාක කොටස් කොයි තරම් විනාශ කරනු ඇත් දැයි සිතීම පවා බියකරුය. කොලරොඩු ටික දිරාපත් කරන බැක්ටීරියා ටික මැරෙද්දී කුඩා සතුන් ටික මැරෙද්දී සිංහරාජය මැද පාරට ගද දැනෙන්නට පටන් ගනු ඇත. වාහන වල ගමන් ගන්නා දියුණු වූ ගම්වැසියන්ට එය මදි පුංචිකමක් වනු ඇත. ගද නැති කර ඉල්ලා ගම් වැසියන් උද්ගොෂණ කරනු ඇත ඒ දිනයේ දීද පරිසරවේදීන් වැරදිකරුවන් වනු ඇත. කෘතීම රසායණික භාවිතා කර ගද නැති කරනු ඇත. එවිට ඉතිරි කඩා සතුන් ද මි යනු ඇත. එය ආහාර දාමයේ එක් පුරුකක් බිද දැමීමක් වනු ඇත. 

අඩුම ගණනේ හයේ පන්තියේ වාඩි වී සිටය එකෙකු නම් ඉහත අවසාන වාක්‍යය කියවූ පසු හීන් දාඩිය දමනු නිසැකය.

එය ආරම්භයක් පමණක් වනු ඇත. වසර දහස් ගණනක් තිස්සේ නිර්මාණය වූ පරිසර පද්ධතියක් විනාශ කරන්න යන්නේ එක් දිනයක් පමණක්ය. නමුත් ඒ වෙනුවෙන් නැවත පරිසර පද්ධතිය ඇති කිරීමට වසර දහස් ගණනක් ගතවනු ඇත. 

මීට වසර ගණනකට පෙර මා ද මෝටර් බයිසිකලයක නැගී දෙනියායේ සිට ලංකාගමටත් එයින් නෙලුවට හා නෙලුවෙන් නැවත නෙලුව දෙනියාය ප්‍රධාන මාර්ගය ඔස්සේ දෙනියායටත් ගමන් කර ඇත්තෙමි. මා හා එහි ගිය මා මිතුරන් සමග ඒ අවස්ථාවේ දීත් මා කියා සිටියේ මේ ගම්මානය නැවත පදිංචි කල යුතු ය කියාය. ව්‍යාපෘතියේ කොමිස් මුදල් තියෙන අවස්ථාවේ දී තෙල්දෙණිය නතරය ඉවත් කල හැකි වූ වා නම් කොමිස් ගැන නොසිතන්නේ නම් මෙම ග්‍රාමය ඉවත් කිරීම සදහා තීරණ ගැනීම කිරි කජුය.
 
ඒ සියල්ල අවසානයේ ලංකාගමට පාරක් හැදීමෙන් ලැබෙන ආර්ථික වාසියක් නැත. ගම්මානය ප්‍රසාරණය වී දැනට ඇති පවුල් 188ක ප්‍රමාණය 400ක් වීම කෙටි කාලයකින් සිදු වනු ඇත. එවිට ලංකාවේ සිරි නැරඹීමට පැමිණෙන සංචාරකයන් සදහා තවත් එක් සංචාරක පුරවරයක් ඇති වනු ඇත.නමුත් පරිසරයට ආදරය කරන්නා වූ සංචාරකයන් ඒ අතර නොමැති වේවි. 

ලංකාවේ තෙත වනාන්තර වල ඇවිදිමින් ඒ ගස්කොල වැලදගන්නා විදේශිකයන් මා දැක ඇත්තෙමි. ඒ ඇයිදැයි ඔවුන්ගෙන් විමසද්දී තෙත් වනාන්තර නොදැකපු වයස 50ක් වන පුද්ගලයන් ද ඒ අතර සිටියේය. ඔවුන් ඒ ගහ කොල වැලද ගන්නේ කිසිදා නොදැකපු තමන්ට හුස්ම දුන් ගහකොලට කරන ගෞරවයක් වශයෙන් බව ඇසීම එදත් අදත් මා නෙතට කදුලක් උනන්නට සැලැස්වීය. 

කෙසේ හෝ වේවා මතු දිනෙක ඔබේත් මගේත් දරුපරපුර ද එකී විදෙශිකයා සේ හැසිරෙනු ඇත. නමුත් ඒ මාගේ අපූර්ව රට තුල නොව වෙනත් රටක තෙත් වනාන්තරයක ගස් සිඹිමින්ය. එදිනට මේ ලිපිය කියවූ ඔබත් ලියූ මමත් නොදිරා වියළී ගිය ශරීර පමණක්ම වනු ඇත.

දුරස්ථ පාලක ගුවන් යානාවක් හදමු..

ඉස්සර වගේ නෙවෙයි දැන් දැන් බ්ලොග් එකට ලිපියක් ලියන්න කාලයක් හොයා ගන්න එක ලේසි නැහැ. ඒ කොහොම වුනත් කාලෙකට පස්සේ ලැබුන ඉඩෙන් කියවන අය වෙනුවෙන් වැදගත් දෙයක් දෙන්න ලැබෙයි කියල හිතෙනවා. 

කාලෙකට කලින් වගේම දැනුත් මගේ ආසම විෂසයක් වෙන්නේ භෞතික විද්‍යාව. හැබැයි ඒක මහා අණ්ඩරදෙමළයක් වගේ අන්තවාදීව හිතන්න නම් මගේ ආසාවක් නැහැ. තවම. අපි ඉගෙන ගන්න සරල භෞතික විද්‍යාව ප්‍රායෝගිකව යොදා ගන්න පුලුවන් විධි ගැන මගේ කවදත් ආසාවක් තිබුනා. මේ එයින් එක් අවස්ථාවක් භාවිතා කරල පොඩි සෙල්ලමක් කරන හැටි ගැන. 

බර්නූලී.. තරල ගති විද්‍යාව ඉගෙන ගද්දී අපි හැමදාම හිතුවේ මොන මගුලකට මේක ඉගෙන ගන්නවද කියලයි. හැබැයි ඒ ප්‍රායෝගික භාවිතයන් ගැන කියාදෙන තරම් පාඩම අගට එද්දී නම් හිගෙනවා මේක වැදගත් කියල. හැබයි ඉතින් ප්‍රායෝගිකව තමන්ම අත් විදින්නේ නැතිව ඒක කොයා තරම්ද කියන එක තේරෙන්නේ නැහැ කියන එකයි මගේ නම් අදහස.

කොහොම වුනත් පින්තූර ගන්න විනෝදාංශය අස්සේ මේ අලුත් විනෝදාංශයක් අත්හදා බලන්න අවස්තාව ලැබුනේ RC Arena කියන දුරස්ථ පාලක ගුවන් යානා සම්බන්ධ සංගමයක මගේ මිත්‍රයෙක් වුන චාමර අයිය. ඒ කුඩා ගුවන් යානයක් හදන්න ඕන කරන සියලු උපකරණ ටික තෑග්ගක් විදිහට ගෙදරටම ලැබෙන්න සලසවලා. මම මේ ගුවන් යානය හැදුවේ කොහොමද කියන එක නම් මම සම්පූර්ණ වීඩියෝ එකක් විදිහට මගේ youtube channel එකේ දැම්මා. මම හිතනවා ඔයාල ඒකට කැමති වෙයි කියල. ඒ නිසා ඒක බලලම ඉන්න. ඒක ඇතුලේ මම පැහැදිලි කරනවා මේක හදන්නේ කොහොමද කියල.

මේ තියෙන්නේ දුරස්ථ පාලක ගුවන් යානාවක් හදල උඩ යවන්න කැමති කෙනෙක්ට පටන් ගන්න තියෙන හොදම තැන කියලයි ලංකාවේ ඉන්න දුරස්ථ පාලන ගුවන් යානා එක්ක සෙල්ලම් කරන අය නම් කියන්නේ..

Blue Baby ගුවන් යානාවේ මුලික දේවල් ගොඩක් ගැන ඉගෙන ගන්න තියෙනවා. බර්නූලි වල මූලික කරුණු ටික. බලය හැසිරෙන හැටි. ඒ වගෙමයි throttle එක elevator එක සහ Rodder එක කියන මූලික දේවල් විතරක් තියාගෙන ප්ලෙන් එක ඉහල පහල යවන්න සහ හරවන්න ඉගෙන ගන්න හොදම ගුවන් යානාව Blue Baby එක. 

ලංකාව ඇතුලේ මිග් එකක ආකෘතියක් පවා ගුවන් ගත කරන්න පුලුවන් පොඩි පොඩි කොලු ගැටව් ඉන්නවා. තින් ගුවන් යානාවක් උඩ යන හැටි හැරවෙන හැටි විතරක් නෙවෙයි ගුවන් සංදර්ශන වලදී කැරකෙන එක පවා සිදු කරන්න පුලුවන් තරම් මේ ගුවන් යානා ආකෘති සාර්ථකයි කියන්න පුලුවන්. 

හැබැයි ඉතින් ලංකාවේ තියෙන නීති එක්ක සැහැල්ලු ගුවන් යානාවක් හරි ඩ්‍රෝන එකක් හරි ගුවන් ගත කරනවා නම් හිතන් ඕන කාරුණු ගණනාවක් තියෙනවා. ඉතින් කවුරු හරි ඒ ගැන ඉගෙන ගන්න කැමති නම් මම කලින් ලියපු ලිපියක් පහල ලින්ක් එකේ තියෙනවා ඒක කියනවල බලන්න. ඒ ලිපිය ලියන කාලය වෙනකොට අවසර ගන්න ඕන වුනේ සිවිල් ගුවන් සේවා අධිකාරියෙන් විතරක් වුනාට දැන් නම් ආරක්‍ෂක අමාත්‍යාංශයේ අවසරයත් ඕන වෙනවා. ඒ රටේ පවතින තත්ත්වය නිසා. 


ඉතින් කවුරු හරි කැමති නම් මේ විනෝදාංහයට එන්න පුලුවන් හැබැයි නීති රීති  ආදිය ගැන හොද අවබෝධයකින් එන්න කියන ආයාචනය කරන්න ඕනි.මොකද එක්කෙනෙක් කරන වැඩක් නිසා මේ විනෝදාංශය සදාකාලිකව අපේ රටේ තහනම් වෙන්න පුලුවන්. ඒ නිසා තමන් කරන දේ ගැන හොද අවබෝධයකින් පටන් ගන්න වගේම ඒ තුල ඇති ආචාරධර්ම වලට අවනත වෙන්න කියන ඉල්ලීම කරනවා. 

එහෙනම් හැමෝටම ආයුබෝවන්.. 

Macro Rail එකක් ගෙදරදීම හදාගමු - දන්න සිංහලෙන් Macro Photography - සයවන කොටස

Macro Rail එකක් නැතිව Focus Stack එකක් කරගන්න ගිහින් කරදරේ වැටිල ඉන්න අය වෙනුවෙන් Macro Rail එකක් ගෙදරදි හදාගන්නේ කොහොමද කියන එක ගැන මම කරපු පරීක්‍ෂණයක අවසන් ප්‍රතිඵල ඔයාලත් එක්ක බෙදා ගන්න හිතුවා. මේ ඒ දේ කරන්න ඕන කරන සම්පූර්ණ රූප සටහන් වලින් සිදු කරල තියෙනවා.

ඒ සියල්ල දිග පළල සම්බන්ධයෙන් පවා දක්වල තියෙනවා. ඒක කරන්නේ කොහොමද කියන එක ගැන මම කල වීඩියෝ එක තමයි පහලින් තියෙන්නේ.



මේ සම්බන්ධයෙන් සම්පූර්ණ විස්තරය වීඩියෝ එකේ තියෙන නිසා වැඩි විස්තරයක් ලියන්න බලාපොරොත්තු වෙන්නේ නෑ. මේ සම්බන්ධයෙන් මම ඇදපු රෑප සටහන් වල භාවිතා කරන්න ඕන ද්‍රව්‍ය හා ප්‍රමාණ සම්බන්ධයෙන් තියෙනවා.

මේ වගේ එකක් හදාගෙන පින්තූර ටිකක් අරන් බලන්න. ඔයාලට ගෙදර ඉදන් Macro Photographs ටිකක් ගන්න සහ මේ උපකරණය Manual Focus support කරන ඕනම කැමරාවක් එක්ක භාවිතා කරන්න පුළුවන්. කැමරාවේ බර අනුව භාවිතා කරන ද්‍රව්‍ය මාධ්‍යය තීරණය කරන්න.
මේ විදිහට උත්සාහ කරල ඔයාල හදාගත්ත Macro Rail එකේ පින්තූරයක් දාන්න බලන්න. ඔයාල උත්සාහ කලි කියන එක මේ වගේ තව තව දේ ගැන ලියන්න මාව උනන්දු කරවාවි..

ස්තූතියි හැමෝටම..

මේ දින වල සිදුවන අන්තර්ජාල දත්ත වංචාව - Corona Special

මේ කියන්න යන කතාව පහුගිය මාස කිහිපය තුල සිදුවුන සහ මම අධ්‍යයනය කල දෙයක්. මම භාවිතා කරන අන්තර්ජාල සේවා ලබා ගන්න හා දුරකථන ඇමුතුම් ලබා ගන්න භාවිතා කරන ආයතන දෙකක සිම්පත් තියෙනවා. ඒ වගේම මගෙ සහෝදරයා  වත් ආයතනයක සිම්පතක් භාවිතා කරනවා.

පහුගිය කාලය පුරා ඔවුන් අන්තර්ජාල සේවා සදහා ලබා දෙන පහසුකම් වල වැරැද්දක් තියෙනවා කියල පෙනුන නිසා මම පොඩ්ඩක් මේ ගැන බැලුවා. මේක සම්පූර්ණ මගේ අත්දැකීමක් වෙන අතර මේ සම්බන්ධයෙන් ගැටලු සියල්ල එකී ආයතන වෙත දුරකථනය මගින් විමසීම් සිදු කලා. ඒ සම්බන්ධවත් ඔවුන්ගේ පිළිතුරු සාරාංශයනුත් මෙහි ඇතුලත්.. ඒ සම්බන්ධව සියලු රෙකෝඩින් සහ කෙටිපණිවිඩ හා Chat වල Screen Shots තිබේ.

සාමාන්‍යයෙන් මම මගේ දත්ත අවශ්‍යතාවයන් සදහා මෙම සමාගමේ ලබා දී ඇති මෘදුකාංගයක් භාවිතා කරල එහි සදහන් පැකේජ අතරින් මට ගැලපෙන පැකේජය සදහා මුදල් මගේ බැංකුව මගින් යොදවන එක තමයි කරන්නේ. ඒ වගේම මගේ සිම්පත තියෙන්නේ portable hotspot එකක යොදවලා නිසා එහි ඇමතුම් හෝ කෙටි පණිවිඩ සේවාවන් මම භාවිතා කරන්නේ නෑ. ටික දවසක ඉදන් මම යොදවන මුදල් මගේ මෘදුකාංගය තුල පෙන්වන්නේ නෑ. මේ සම්බන්ධයෙන් විමසීම් කිරීමට උත්සාහ ගත්තද රටේ පැවති අහිතකර තත්ත්වය නිසා පාරිභෝගික සේවා නිලධිරීන් නොමැති බවත් ඒ සදහා ඔවුන්ගේ ෆේස්බුක් පිටුවේ පණිවිඩ තබන ලෙසත් සටහනක් භාවිතා කර තිබෙනවා. ඒ අනුව මම යොදවපු ෆේස්බුක් සටහනට දවස් ගානකට පස්සේ ප්‍රතිචාර ලැබුනා. එයට යොදන පිළිතුරට තවත් දවස් ගානකින් ප්‍රතිචාර. මේ වන විට එම පැජෙය භාවිතා කරමින් ඔවුන් හා සංවාදයේ යෙදුනු අතර දින ගතවන විට අන්තර්ජාල දත්ත නොමැති බව නිසා නැවත මුදල් යෙවීමක්සිදු කලා. නමුත් පෙර ලෙසම මට අවශ්‍ය පැකේජ භාවිතා කරන්න නොහැකි වුනා. 

සති කිහිපයක ව්‍යායාමයකින් පසු ඔව්න් සම්බන්ධ වී මා වෙත පැකේජය සක්‍රීය කරන බව පැවසූවත් එය මට අවශ්‍ය පැකේජය නොවේ. පසුව මා ඔවුන්ගේ වෙඩ් අඩෙවිය පරීක්‍ෂා කිරීමේදී එකම මුදල් ප්‍රමාණය සදහා විවිධ පැකේජ ඇති බවත් ඔවුන් සක්‍රීය කර ඇතතේ වෙනත් පැකෙජයක් බවත් සදහන් කලා. මා හට එය නැවත මට අවශ්‍ය පැකේජය බවට පත් කර ගැනමේ හැකියාවක් තිබුනේ නැහැ. අවසන ඔවුන්ගේ සේවා ලබා ගැනීම මා තාවකාලිකව නවතා දැමුවා. 

නමුත් රාජ්‍ය සේවයේ යෙදී සිටින මා හට මාගේ රාජකාරි ස්ථානයෙන් ලබා දෙන පණිවිඩ සම්බන්ධයෙන් හා පවරනු ලබන කාර්යයන් සම්බන්ධයෙන් නිරතුරුව අන්තර්ජාලය තුල මාගේ විද්‍යුත් තැපැල් යාවාත්කාලීන වන ආකාරය පිලිබදව සැලකිලිමත් විය යුතු බැවින් මා භාවිතා කරනු ලබන වෙනත් සිම්පතකට මුදල් යදවීම සිදු කලා. එයින් ලැබුනේද පෙර ආකාරයට සමාන ගැටලුවකි. මාගේ මුදල් නිකරුණේ වැය වූ අතර ගෙවූ මුදලින් මට අවශ්‍ය සේවාව නොලැබී ගියේය. මේ සම්බන්ධයෙන් එකී ආයතනයෙන් ලැබුණේද පෙර ආයතනයෙන් ලැබුණු පිළිතුරු හා සමානම පිළිතුරකි.

මාස දෙකක් පමණ ගෙවී ඇති අතර මා මේ වන විට මට අවශ්‍ය වන සේවාව වෙත නොව ඔවුන් ලබා දෙන මා නොදන්නා සේවාවන් වෙනුවෙන් රුපියල් 3000කට ආසන්න මුදලක්ද මාස තුනක කාලය පුරා මේ සේවාවන් සම්බන්ධ ගැටලු පිළිබද විමසමින් ගත කල කාලයට අපතේ ගොස් ඇත.

සතියකට පමණ පසු අද දින ද මා අන්තර්ජාල සේවා ලබා ගැනීමේ අවශ්‍යතාවය හේතුවෙන් නැවත දත්ත ලබා ගැනීම සදහා උත්සාහ කල අතර මා යෙදවූ මුදල අදාල මෘදුකාංගයේ නොපෙන්වීම නිසා අදාල ආයතනය මගින් විමසීමටම කටයුතු කලා. එහිදී ඔවුන්ගේ මෘදුකාංගයේ සදහන් එකම හදිසි ඇමතුම් අංකය වන1788 අංකය ඇමතූ විට ස්වයංක්‍රීය පණිවිඩ ගණනාවකින් පසු පාරිභෝගික සේවා නිලධාරීයා හා සම්බන්ධ වීමෙන් පසු 078 අංක පමණක් ඔවුන් ලබා ගනානා බවත් 072 අංක වෙනත් අංශයක් වෙත මාරු කල යුතු බවත් පවසමින් ඇමතුම වෙනත් අංකයක් වෙත යෙමු කරනු ලැබුවා. නමුත් එය ලබා ගැනීමේ කෙනෙකු නොමැතිව විසන්ධි විය. 

නැවත නැවත ඔවුන් ඇමතීමේ පසු ඔවුන් එහිදී පැවසූවේ වෙනත් පැකේජයක් සක්‍රිය වී ඇති බවයි. එය ස්වයංක්‍රීය වශයෙන් සිදු වී ඇති බව පවසමින් මා විමසන කරුණු වලට පරස්පර විරෝධී කරුණු දක්වීමක් සිදු කලා. ඔවුන්ගේ වෙප් අඩෙවිය පරීක්‍ෂා කිරීමේදී එකම මුදල් ප්‍රමාණයෙන් විවිධ පැකෙජ ඇති බවත් ඒවා කෙටිපණිවිඩයකින් පමණක් සක්‍රීය වන බවත් සදහන් කර තිබුනා. නමුත් එම මුදල් පුමාණය යෙදී පුසු ස්වංක්‍රීය සක්‍රීය වීමක් සිදුවෙනවා. රුපියලක වෙනසින් විවිධ සේවා ඇති අතර සමහරක් අයිඩීඩී පැකේජ වෙන අතර සමහරක් ඇමතුම් පැකේජ වේ.

කෙසේ හෝ වේවා TRCSL හි අනුමැතිය ඇතිව මෙම පැකේජ සකස් කර ඇති බව සදහන් ැවින් රජයේ වගකීමක්ද මෙය සතු වනවා. එබැවින් මෙ සම්බන්ධයෙන් සොයා බලා කටයුතු කිරීම සුදුසු බව මාගේ හැගීමයි. මා පෙර ජනපතිට කියන්න වැඩසටහන හරහා කරන ලද පැමිණිල්ලක් වසර දෙකක් ගතවී ඇත අද දිනය වන විටත් විමසීම් කර හෝ නොමැති බැවින් තවදුරටත් රජයේ අදාල පාර්ශවයන් වෙත පැමිණිලි යොමු කිරීමට තරම් විස්වාසක් මා තුල නොමැත. මෙ සම්බන්ධයෙන් කරන ලද පැමිණිල්ලක් වසර 10කින් පමණ විභාග වෙන වා නම් මා කුමට ඒ සම්බන්ධයෙන් බලා සිටින්නද.

ලංකාවේ වත්මන් ජනපතිතුමන් විසින් විදෙස් ගත වූ ලංකාවේ මොළ ටික නැවත ගෙන්වා ගැනීමට කටයුතු කරමින් ඉල්ලීම් කරනමින් සිටියදීත් මෙවැනි වංචා සිදුවීම හා රාජ්‍ය ආයතන මගින් නියමිත සේවා ලබා නොදීම යන කරුණු හේතුවෙන් ඔවුන් ලංකාවට පැමිණීම සිදු කරයිද යන කරුණ ද මා හට සිහිවේ. මා දන්නා බොහෝ පිරිසක් මේ වන විට මෙවැනි අඩත්තේට්ටම් වලින් මිදීම සදහා ලංකාව හැරගොස් සිටින බැවින් තවදුරටත් මෙවැනි දේ සිදුවීම වලක්වා ගත යුතුය.